Цадиггүй тангараг
- ISBN: 978-99973-0-439-1
- Хавтас: Зөөлөн
- Хэвлэгдсэн он: 2014
- Хуудас: 149
- Хэмжээ: 200*128мм
- Жин: 185
- Үлдэгдэл: Дууссан
Юугаар ч солишгүй залуу насандаа дүн шөнөөр, үүр гэгээртэл эрүүл мэндээ золин байж таталсан хэдэн бадаг шүлгээ таньд хүргэж байна. Буурай ээжийн бор ягаан дээлтэй, улаан хацартай, шилбүүр унаад хонио хариулж өссөн жаахан бор хүүгийн ертөнцөөс таниулж байна. Зовох цагийн салхинд алгадуулж жаргах цагийн наранд дулаацсан идэр залуухан шинэ эмчийн он жилүүдийн хэлхээсээс хуваалцаж байна. Цадиггүй зан нэвт үнэртэх өврийн дэвтрээ ийнхүү та бүхэнд ном болгон дэлгэлээ. Зохиогч
Анх удаа би аавынхаа тэргүүнд
Амирлахад нь хүрч үзлээ
Сайхан ханагар аавынхаа санчигийг
Санаа алдан үнэрлэлээ
Дуу цөөнтэй аавынхаа дөлгөөн харцыг
Дугариг нүдэндээ нулимс хураан ширтлээ
Сүү үнэртсэн аавынхаа чийгтэй духыг
Сүслэн залбирч үнслээ
Тэнгэрт халих аавынхаа үгийг
Тэмтрэгдэхээ болих судасных нь лугшилтаас сонслоо
Бурханд хувилах аавынхаа сэтгэлийг
Сонсогдохоо болих зүрхнийх нь цохилтоос мэдэрлээ
Сүүлчийнх нь өнгөц амьсгалыг өмөлзөж хүлээхдээ
Сүүдрийг нь түшээд буруу харан мэгшлээ
Сүнс нь дэгдээд явахад нойтон даавууг нь хуурайлж
Сүү амлуулж нялх үр шиг ээ энхрийллээ
Миний аав зун цагт зул шиг бадамлаж байна.
Миний аав нарт хорвоогоос нар шиг жаргаж байна.
