Эцэг эхчүүдийн эрүүл мэндийн боловсролоос гэр бүлийн эрхэм гишүүн – хүүхдийн эрүүл мэнд, өсөлт хөгжил хамаардаг.

“Яасан нь мэдэгдэхгүй” уйлж, халуурч, өвдөж шаналсан хүүхдийн учрыг зөв олох амаргүй ч аливаа өвчин эмгэгийн нотолгоонд суурилсан орчин үеийн анагаах ухааны нэгдсэн нэг зарчмаар оношлон эмчлэх стандарт удирдамж даяарчлагдаж буйг баярламаар ололт гэлтэй. Үсрэнгүй хурдацтай хөгжиж буй салбарын нэг нь анагаах ухаан, түүнтэй хөл нийлүүлэн алхах нь түмэн олныхоо өмнө хүлээсэн эмч бидний үүрэг юм.

Манай эцэг эхчүүд хүүхдийн өсөлт хөгжил, өвчин эмгэгийн талаар ямар шинж, зовиураар эмчид ханддаг, ямар асуудалд илүү дэлгэрэнгүй тайлбар авахыг хүсдэг, ямар буруу ойлголт, цуу яриаг засаж залруулах ёстой, өнөө цагт хүүхдийн анагаахын ямар ойлголт, зарчим /оношлогоо, эмчилгээ/ өөрчлөгдсөн, эцэг эхчүүдийн заавал мэдэж байх ёстой зүйлс зэргийг тунгаан анхны хэвлэлээ туурвив. Олон эцэг эхчүүдийн хүсэлтээр туурвисан энэхүү ном хэвлэгдэн гарч таны гар дээр очиж байгааг тэмдэглэхийг хүсэж байна.

Энэхүү ном нь хүүхдийнхээ төлөө бүхнээ зориулдаг аав, ээж, өвөө, эмээ төдийгүй хүүхдийн эрүүл мэндэд санаа тавих хэн боловч уншиж судлахад зориулагдсан болно.

Зөвөлгөө, мэдээллийг илүү ойлгомжтой хүргэх үүднээс номыг “Асуулт-Хариулт” хэлбэрээр бичиж холбогдох зургаар баяжуулан гол нэршлийг англи хэллэгээр хадаж өгсөн.

Танай гэр бүлд болон үр хүүхдэд тань эрүүл энхийн нэгэн жаргаланг хүсэн ерөөе.

Хүндэтгэсэн:

Т.Навчаа:  Хүүхдийн их эмч, АУ-ны доктор, Клиникийн профессор

М.Түмэннасан: Хүүхдийн мэс заслын эмч, МУ-ын төрийн шагналт, АУ-ны доктор, Клиникийн профессор

“ХҮҮХЭД ба ГЭР БҮЛ” НОМ ЯМАР ҮР ДҮНГ ХҮЛЭЭЖ БАЙГАА ВЭ?

Нийслэл, хөдөө орон нутагт 2 сарын хугацаанд “ХҮҮХЭД ба ГЭР БҮЛ” номыг 2000 гаруй айл өрх худалдан авч уншин талархалаа илэрхийлж байгаад баяртай байна.

Зинт клиник 2 жил ажиллахдаа үйлчлүүлэгчдээ нотолгоонд суурилсан орчин үеийн анагаах ухааны зөвөлгөө өгч багагүй амжилтанд хүрсэн нь ажиглагдаж үүндээ урамшин зөвөлгөөгөө түмэн олондоо хүргэх зорилгоор энэхүү номыг туурвисан билээ.

Манай эцэг эхчүүдийн хүүхдээ эмчид үзүүлдэг зарим зовиур нь зөвхөн уншиж мэдэхэд л хангалттай хэвийн шинж байдаг төдийгүй хүүхдийн өсөлт хөгжил, өвчин эмгэгийн талаарх мэдлэг, мэдээлэл нь "хуучирсан", буруу ойлголт, хандлагатай, түүнчлэн эмч нарын зөвөлгөө хоорондоо зөрж “толгой эргүүлдэг” зэрэг нь эрүүл мэндийн боловсролыг өнөө цагт нийцүүлэн дээшлүүлэх шаардлагатайг харуулдаг.

Фейсбоок хуудсаараа нярай, хөхүүл хүүхдэд тархины даралт гэдэг оношийг түгээмэл тавьдаггүй, тэдэнд шаардлагагүй эм өгөх ёсгүй, нярайн шарлалтын үед Лив 52, урсофальк зэргийг өгдөггүй, хүүхэд хөлрөх нь Д аминдэмын тунг ихэсгэх үндэслэл болдоггүй, эрэгтэй хүүхдийн бэлэг эрхтэн-шодой өөрөө аяандаа шамрагддаг, чанартай эмийг яаж сонгож авах ёстой зэрэг 200 гаруй мэдээлэл, мессеж түгээсний үр дүнд олон эцэг эхчүүдийн ойлголт, хандлага өөрчлөгдөж байна. Байнгын үйлчлүүлэгчид маань ч эдгээр мэдээллийг цааш нь түгээж байгаад талархдаг.

Ингээд Та бүхэнд “ХҮҮХЭД ба ГЭР БҮЛ” номын зорилго, хүлээж буй үр дүнгээс танилцуулахыг хүслээ. Эцэг эхчүүдийн эрүүл мэндийн боловсролыг дээшлүүлснээр:

1.Шаардлагагүй олон тохиолдолд эмчид, эмнэлэгт ханддаг явдлыг багасгах

2.Ямар тохиолдолд эмчид хандах ёстой, хүүхдэд ялангуяа нярай, хөхүүл, бага насны хүүхдэд илрэх ямар шинж нь хэвийн, ямар нь хэвийн бус гэдгийг ойлгуулах

3.Дийлэнх өвчин эмгэгийг эмнэлэг хэвтүүлж бус эмчийн зөв онош, эмчилгээгээр гэртээ эмчлүүлж болдог гэсэн орчин үеийн хандлагыг нийгэмд төлөвшүүлэх

4.Эцэг эхчүүд ялангуяа ээж нар интернетийн группэд нэгдэн худал үнэн нь нотлогдоогүй мэдээлэл, цуу яриаг нэг нэгэндээ түгээж, түүний дагуу хүүхдээ өсгөх, эмчлэх гэж оролддог буруу үзэгдлийг багасгах гэх мэт олон эерэг үр дүнг хүлээж байгаа билээ.

Энэ үр дүн биелэгдээсэй гэж аав, ээж бүр хүсэж байгаа нь дамжиггүй. Уг ном нь 2 жилд шинэчлэгдэж, зөвөлгөө, мэдээлэлээр баяжигдан хэвлэгдэх болно.