Эмэгтэй хүний амьдрал 20 наснаас эхэлдэг I
- ISBN: 978-99962-8-181-5
- Хавтас: Зөөлөн
- Хэвлэгдсэн он: 2015
- Хуудас: 261
- Хэмжээ: 205*140мм
- Жин: 290
- Үлдэгдэл: Дууссан
Нэг өдөр л би ухаан сууж билээ. Хорин настай байхдаа нүдэндээ хар шил зүүсэн мэт урдах замаа олохгүй алдаж онож байсан үе маань ард хоцорч, нүдний өмнөх бүрхүүл нээгдэж би юу ярьж, ямар үйл хөдлөл хийх ёстойгоо мэдэхгүй сандрах гэх мэт зүйлс бүгд л өнгөрсөнтэй минь хамт үгүй боллоо. Хүмүүстэй хамт байсан ч ганцаараа байгаа мэт амгалан, ганцаараа байсан ч хэн нэгэнтэй хамт байгаа мэт хөгжилтэй байж чаддаг боллоо. Бүхнийг мэддэг болж чадаагүй ч гэсэн мэдэхгүй байгаа юм маань юу болохыг тодорхой мэддэг болсон юм. Би гучин нас хүрлээ!
Хорин есөн настай байхдаа би гучин настайгаа золгож байгаа эгч нарынхаа “найрладаг нас өнгөрлөө” хэмээн хэлж байгааг дуулаад ер ойлгодоггүй байж билээ. Гэтэл яг гучин нас хүрээд харахад хорин насны амьдрал гучин насны амьдрал хоёр огт өөр болохыг ухаарлаа. Гуч гарсан эгч нар яагаад тэгж илэн далангүй торох юмгүй ярьж, үйл хөдлөл нь мөн тийм байдгийг аяндаа ойлгосон юм. Хорин настай байхад ярианы гол сэдэв байсан “яаж амьдрах ёстой вэ?” гэсэн асуултын хариултыг би гучин насандаа олж авсан нь нэг ёсны гучин насны надад өгч байгаа бэлэг байлаа. Зохиолч гэдэг мэргэжлээсээ болоод ч тэр үү хүмүүсийн ахуй амьралыг сонирхох дуртай би, гэдэг хүн удаан ажиглалт туршилтын үндсэн дээр аз жаргалтай, атаархам сайхан амьдарч байгаа эмэгтэйчүүдээс нэгэн нийтлэг шинжийг олж харлаа. Тэдгээр эмэгтэйчүүдэд онцын зүйл биш байж мэдэх авч тэдэнд ямар нэгэн онцгой зүйл байгаа нь гарцаагүй байв.
Сайхан амьдарч байгаа эмэгтэйчүүдийн зан төлөв, чиг хандлага нь одоогийн амьдралынх нь хэв маягтай нь яв цав таарч байгааг хараад гайхшаа барах үе надад олон байдаг. Удаан уулзалдаагүй найзуудтайгаа уулзахад тэдний байдал миний төсөөлж байснаас нэг их хол зөрж байсан удаагүй юм. Хорин насандаа сайхан амьралыг цогцлон бүтээж чадахаар чиг хандлагыг бий болгосон эмэгтэй гуч гарсан хойноо ч мөн л сайхан амьдарч байхад, зовлонг өөрийн гараар бий болгодог зан чанарыг өөртөө хэвшүүлсэн хүн мөн л аз жаргалгүй амьдарч байгааг харж болохоор байлаа. Тэгж байтал гэнэт ийм бодол төрлөө. Сайхан амьдралыг цогцлон бүтээх чадварыг эзэмшсэн нэг нь сайхан амьдардаг юм бол тэднээс суралцаж тэднийг дуурайвал болох юм байна гэсэн бодол.
Уг бодлоос улбаалан энэхүү номоо бичих болсон юм. Аз жаргалтай, атаархам амьдрах аргыг сурч түүнийгээ ажил хэрэг болгож эхэлснээс хойш миний өөрийн амьдрал эрс өөрчлөгдсөн юм. Би урьдынхаасаа илүү аз жаргалыг мэдэрч, урьдынхаасаа илүү чинээлэг болж бас урьдынхаасаа илүү эрүүл саруул болж чадсан юм. Нэмж хэлэхэд би амьдралын энэ нарийн учрыг хориод насандаа ухаарсан бол амьдралынхаа маш олон зүйлийг эрс өөрчилж болох байждээ гэсэн харуусал төрснийг нуух юун. Сүүлийн үед амьдралын хэв маяг их өөрчлөгдсөн хэдий ч хэн юу ч гэж байсан эмэгтэй хүний амьдралд сонголт хийх боломжоор дүүрэн нас нь хорин нас билээ. Нөгөөтэйгүүр гучин насанд ажил, гэр бүл, амьдралын хэв маяг гээд бүх зүйл аль хэдийн биднээс үл хамааран тогтворждог. Гуч хүрвэл оройтно. Хорин настай золгож байгаа миний охин дүү, мөн түүнтэй хамт нэгэн үед амьдарч буй 20 насандаа яваа бүх охид маань над шиг хорин насаа гэнэн тэнэг байдлаар битгий өнгөрөөгөөсэй гэсэн чин сэтгэлийн үүднээс энэхүү номоо бичлээ. Энэ ном нь одоогийнхоосоо илүү сайхан амьдрахыг хүсч байгаа эмэгтэйчүүдэд гарцаагүй тус болно гэж бодож байна. Гагцхүү та энэ номыг өөрийн ширээний номоо болгож, уншиж бас дахин уншиж байх ёстойг бүү март.
Зохиолч Нам Ин Сүг
