Номонд өргөх сэтгэлийн цөөн үг

Хүсэл мөрөөдөл, амь нас, зүрх сэтгэл, итгэл... Бүгдийг сйичүүлсэн ч тэсч үлдсэн турьхан агаад хүчирхэг оршихуй. Халирч зугтаам олон хагалгаа, хадаас, төмөр. Өс бус өршөөл хайраар хатуу бүгдийг ялж яваа эрхэмсэг гоо үзэсгэлэн. Ховорхон тохиолдолд хувь тавилан бүсгүй хүнд төгс гоо сайхныг заяадаг ч түүнд хүрэхийг, эзэмдэхийг эс чадваас хорлохыг үгүй хийхийг хүсэгчид цөөн биш.

Эл бүсгүйн бичсэн номонд өмнөтгөл бичих амаргүй хүсэлт хүлээн аваад нилээн хэсэг хугацаа өнгөрөв. Надаас хамаагүй хол давсан тэвчээр, хат, ухаан, билэг авьяасаар бүтсэн энэ бүтээлийн эхний хуудас өчүүхэн миний үгээр эхэлнэ гэхэд хэтэрхий ахадсан мэт. 

Миний бие амьдралын хатуу хүйтэнг үзэж туулснаараа энэ агуу эмэгтэйн хаа ч хүрэхгүй ээ. Гэхдээ бүсгүй заяаны хүчирхэг агаард эмзэг өнцгөөр яалт ч үгүй бид огтлолцоно. А. Пүрэвмаа бол ухаарал, хайр, энэрэл, хат тэвчээрийн яруу үлгэр.

Монгол орны нийслэл Улаанбаатар хотын гудмаар алхах охид бүсгүйчүүд. Аз жаргалтай, дөлгөөн зөөлөн харцтай нь үнэндээ олон бус. Хүн бол сэтгэлийн амьтан гэж бид ярьдаг, сэтгэл гийж харц сэргэхэд ганц л үг хэрэгтэй. Гэхдээ хаа хамаагүй хэн нэгний бус хайртай хүн, хань бүлийнх нь ганц үг. Ганцхан дулаан үгээр бүсгүй хүнийг дутааж гундаачихаар яаж гэр орон, улс гэр минь гийх билээ... Хайрлагдах гэж, нандин байх гэж ижий эх, эхлэл болох гэж ирсэн бүсгүй заяаг хайрла. Бүсгүй хүний тэсч даадаг тэр бүгдийг энд үл өгүүлье.

Бүсгүй хүн бүрийн төрөлх зөн бол үрээ, ханиа, хайраа, үхтэлээ үнэнч хайрлах. Өгсөн үнэнч сэтгэлийг нь өөрөөсө төөрүүлж бүхий л насаараа хамт байгаад уйддаггүй улам л хайраа өгч уярдаг үнэнч занг нь сэвтээж, бүсгүй заяанд ирэх эрийн тоог дутаа.

Уудам орчлонд удмаа залгуулж амьдрах бүсгүй хүн бүр гэгээн хийгээд ариун амгалан байх болтугай хэмээх ерөөл үгээр өмнөтгөл үгээ өндөрлөе!

 “Монгол тулгатны 100 эрхэм” нэвтрүүлгийн

санаачлагч, редактор Пүрэв-Очирын Анужин