Миний өссөн Монгол ахуй
- ISBN: 978-99973-63-81-7
- Хавтас: зөөлөн
- Хэвлэгдсэн он: 2016
- Хуудас: 310
- Хэмжээ: 210*140мм
- Жин: 390
- Үлдэгдэл: Үлдэгдэлтэй байна
АНУ-ын Калифорнийн Их сургуулийн Зүүн өмнөд Ази судлалын хүрээлэнд зочин эрдэмтэнээр ажиллаж буй доктор Ширчингийн Баатарын түүх, археологийн сэдвээр бичсэн олон сонирхолтой бичлэгүүдийг бид амтархан уншдаг билээ.
Тэрээр Өвөрхангай аймгийн Уянга суманд төрж, аав ээж хоёр нь Улаанбаатарт оюутан байсан болохоор хөдөө эмээ, нагац ах нартайгаа өссөн гэдэг. Хөдөөний хүүхдүүдийн адил морь унаж, адуу үхэртэй хөөцөлдөж, хонь хариулж, малчин хүний өдөр тутмын хар бор ажил хийж өссөн тухайгаа дурсан бичсэн байдаг.
Харин энэ удаа Ш.Баатар Бурханы оронд заларсан ачит буурай ижийнхээ дурсгалд зориулж номон суварга бүтээсэн нь уншигч таны гар дээр очиж байна. "Миний өссөн монгол ахуй" нэртэй номынхоо тухай тэрээр "Буурай ижий минь Бурханы орон өөд од мэт харван одсоноос хойш гурван хаврыг үзэхдээ сэтгэлээ хайлан байж, оюун бодлоосоо шүүсэн дурсамж ном маань уншигч таны гар дээр очлоо. Энэхүү ном маань уншигч таныг хагас жарны тэртээх цаг хугацааны ертөнцөд хөтлөн аялуулнa. Балчир намайг хүрээлэн байсан сайхан сэтгэл, сайн үйлстэй өвгөд эмгэдийн маань хэл яриа, үзэл бодол, үйл ахуй энэхүү номын хуудаснаас хөврөн ундрах буй за. Тэр нүүдэлчин ахуйн хоосорч байгаа орон зайг энэхүү номоор сэтгэлдээ нөхөхийг оролдов. Энэхүү номоо бүх насны хүмүүст зориулан бичлээ. Соёлыг түгээ, соёлыг дэлгэрүүл гэсэн өвгөдийн захиас бий. Номын цагаан буян арвижин дэлгэрэх болтугай!" гэжээ.
