Дээвэр дээр суудаг Карлсон дэлхий дээгүүр аялсаар явна. Түүнийг танихгүй хүүхэд манай гаригт лав үгүй билээ.

       Нуруундаа сэнстэй тэрхүү хөгжөөнт баатар үе үеийн хүүхэд багачуудын дотно найз болж үнэхээр чаджээ. Харин түүний хэзээ хэрхэн төрсөн нь сонин байж магад. Одоо ярьж өгье. Хангирсан одсон ХХ зууны дундуур Швед орноо жирийн нэгэн бичээч бүсгүй аж төрөн суудаг байжээ. Захирлын нарийн бичгийн ажил барагдана гэх биш. Нэгэн орой алжааж ядарсаар гэртээ ирж, хаалгаа таттал хамаг юм нь хөглөрчихсөн байв гэнэ. "Манай өрөө мөн үү биш үү? Юу болчих нь энэ вэ?" гэтэл бяцхан охин нь "Лильонкваст өвөө манайд нисч ирж, бид хоёр өдөржин тоглолоо. Хичнээн зугааатай байсан гээч!" гэж хариулжээ. "Юун Лильонкваст өвөө?" хэмээн асуухад охин нь зохион ярьж гарчээ. Гэртээ ганцаараа хийх байхаа олж ядан уйтгарлан байтал цонхоор нь нэгэн бяцхан хүн нисэн орж ирээд тоглоё гэсэн юмсанж. Охин ч баярлаад хамт наадаж гарчээ. Бас тагдгар бүдүүн хүн чийдэнгийн бүрхүүл тойрон нисч жигтэйхэн зугаатай байсан гэнэ. Гаднаас хүн орж ирэхэд нөгөөх бүдүүн эр жаазтай зурагны ард нуугдаж байсан гэхчлэн ярьжээ. 

       Ээж нь үүнээс санаа аван нисдэг бүдүүн хүний тухай хэд хэдэн өгүүллэг бичиж, радиогоор нэвтрүүлсэн юмсанж. Уран сэтгэмжийн дас хужир нэмэн ургуулан бодсоор охины ярьсан Лильонкваст томоогүй Карлсон болон хувирчээ. Түүнээс хойш жирийн бичээч бүсгүй дэлхийд нэртэй зохиолч болох нь тэр. Тийнхүү дээвэр дээр суудаг Карлсон 1955 онд төржээ. Төрүүтээ л хүүхдийн сонирхлыг татаж эхэлжээ. Аргагүй шүү дээ. Угаасаа л хүүхдийн уран сэтгэмжээс төрсөн юм чинь. Бяцхан уншигчид үргэлжлэлийг нь нэхэх болсон тул тэдний хүсэлтээр 1963 онд "Дээвэр дээр суудаг Карлсон дахин нисэж ирэв", 1968 онд "Дээвэр дээр суудаг Карлсон дахин дэггүйтсэн нь" туужаа хэвлүүлснээр Жаалхүү, Карлсон хоёрын тухай гурван тууж төрсөн түүхтэй.