BOOK.MN | Номын зохиолч Сормуунирш Дашдооров

Сормуунирш Дашдооров

МЗЭ -ийн нэрэмжит шагналт. Ардын уран зохиолч (1997). Монгол улсын төрийн шагналт (1975). Сормууниршийн Дашдооров 1935 оны7- сарын 3-нд Дундговь аймгийн Дэлгэрхангай сумын нутаг Шорвогийн хөх овооны бууцанд малчин ард Сормууниршийн гэр бүлд мэндэлжээ. С.Дашдооров бага дунд болон Багшийн сургууль улмаар Москва хотноо Горькийн нэрэмжит Утга зохиолын дээд сургуулийн дээд курст суралцаж төгссөн байна. 1955 оноос Сэлэнгэ аймгийн Зүүнхараагийн бага сургуульд багш, МЗЭ-ийн "Утга зохиол" сонинд утга зохиолын ажилтан, Өмнөговь, Дундговь аймгийн аймаг хариуцсан мэргэжлийн зохиолч, МЗЭ-ийн хорооны үргэлжилсэн үгийн зохиолын зөвлөлийн эрхлэгч, "Монгол кино" үйлдвэрийн ерөнхий редактор, Батлан хамгаалах яаманд мэргэжлийн зохиолч, "Цог" сэтгүүлийн хариуцлагатай нарийн бичгийн даргаар ажиллаж байсан. “Талын цуурай”, “Нар хиртсэн жил”, “Их бүрдын домог”, “Өндөр ээж” зэрэг кино зохиол бичсэн 1950-иад оноос уран бүтээлээ туурвиж эхэлсэн бөгөөд зохиолч С.Дашдооровын бүтээл нь Орос, Хятад, Болгар, Чех, Унгар, Украин, Белорусь зэрэг дэлхийн улс, үндэстний хэлнээ орчуулагдсан юм. С.Дашдооровын уран бүтээлийг төр засгаас өндөр үнэлж Хөдөлмөрийн гавьяаны улаан тугийн одон, Алтан гадас одон, Хөдөлмөрийн хүндэт медаль болон Ардын хувьсгалын ойн медалиудаар шагнажээ.