Торгуудын туужууд
Эрхлэн гаргасан: Голден легион
- ISBN: 978-99973-43-65-9
- Хавтас: Зөөлөн
- Хэвлэгдсэн он: 2017
- Хуудас: 308
- Хэмжээ: 205*140мм
- Жин: 315
- Үлдэгдэл: Дууссан
Тэнгэр Тэтгэгчийн гучин зургадугаар он шарагчин туулай жилийн намрын дунд сарын хорьд гарсан үес. Аргын тооллын 1771 оны намар цаг. Ижил мөрнөөс дөнгөж эргэж ирээд нутаг нурганаараа төвхнөж суурьшаагүй байтал Тэнгэр Тэтгэгчид бараалхаж золгохоор дотор газрын Чэндэ-г зорьж одсон ихэс ноёд нэг л өдөр хүрч ирцгээвэй. Харь холын Ижил зайгаас хотол даяараа гэдрэг эх нутгаа зорин нүүх зам зуураа хүний үзэж туулж болох зовлон бэрхээс хэтийдсэн илүү ихийг үзэж ах дүү, амраг айл гэрээр нь хошуу хотлоор нь нүүдлийн замд оршуулж чадсанаа оршуулж, хүний газрын хад чулуу, газрын элгийг цөмөлж алд газар алаг ясыг нь үүрд үлдээгэд, хүний ёсоор газрын хээлнээ амирлуулж эс чадсанаа эндэж эцсийн амьсгаагаа татсан тэр л газар нь нүдээр үзэж нулимсаа урсгасаар хөсөр орхиж дайны газраас дайжин нүүдэллэж ирснээс наар хэдхэн сар өнгөрсөн байлаа. Хүний сэтгэлийн шарх эдгэх нь бүү хэл сумны шарх аньж амжаагүй байтал дахин уртын газар нүүх юм гэнэ гэсэн үг яриа нутгийн олны дунд тархах болов.
Манжийн хаан Тэнгэр Тэтгэгч Чэндэ-гийн тэргүүн ноёдын зусланд угийн нутагтаа эргэн ирсэн торгууд нарын ихэс дээдсийг хүлээн авч уулзаад цөмд нь хэргэм шарж, цол зэрэг олгоод нутагт нь одуулсныхаа сүүлээр сайд түшмэл нартаа зарлиг буулгаж энэ харьж ирсэн торгууд нарыг цөөхөн гэлгүй дөрвөн хэсэг хувааж ноёдод нь угийн албатуудыг нь захируулж бие биенээс нь алс хол байлгах нь зүйтэй бий.
