Ц. Буянзаяагийн энэхүү "Хар үхэр, алаг сүүдэр" роман нь уран бүтээлчийн төвөгтэй хөдөлмөр, гэмт хэрэгтний сэтгэл зүй, цагдаагийн тусгай ажилтны аналитик, логик сэтгэлгээ, өнөөгийн нийгмийн амьдралын ээдрээтэй үйл явдал зэргийг хөндөн бичсэн өвөрмөц, сонирхолтой орчин үеийн хүүрнэл болно.  
                                                                                                  1-р бүлэг
Чой өглөө босонгуутаа л гар нүүрээ угаасан болчихоод цайгаа ч уулгүй нэг их яаран урлангаа зорив. Гэрээсээ хэрхэн гарсан, замдаа хэрхэн явж буй гэдгээ ч тэрээр анзаарах сөхөөгүй байлаа. Таг дуугүй хэрнээ хувцсаа их л шаламгай өмсөхийг нь гайхширан харж зогссон эхнэрийнх нь төрх байдал л санаанд нь бүдэгхэн үлджээ. Эхнэр нь баахан л юм хэлээд байх шиг байсан. Чухам юу ярьсныг нь Чой нэгээхэн ч санахгүй байлаа. Санах гээд байх ч шаардлага түүнд байсангүй. Бодвол хар өглөөгүүр юундаа яарав, унд цайгаа уугаад яв хэмээн хэлээ биз. Энэ үгийг эхнэр нь Чойг өглөөний цайгаа уулгүй гарах болгонд л хэлдэг юм. Тэрээр машинаа гудамжны зогсоол дээр санд мэндхэн тавьчихаад шатаар өгсөн урлангийн өрөө рүүгээ гуйхээрээ явлаа. Өглөө эрт ирсэн болохоор ашгүй зогсоолд машин тавих зай байж. Оройтож ирвэл машины зогсоол олдоно л гэж байхгүй. Ямар сайндаа л машинаа тавих зогсоол олж харна гэдэг чоно харахаас хийморьтой зүйл болсон гэдэг яриа олны дунд түгэхэв дээ. Уг нь монголчууд хэзээнээс л чоно олж харвал өөрсдийгөө одтой хийморьтой явна хэмээн бэлгэшээдэг асан. Одоо тэгвэл машин тавих зогсоол олж харна гэдэг чоно харахаас ч илүү азтай, хийморьтой зүйл болоод хувирчихаж. Суурин ахуйн хэвшил ийм л хойно яая гэхэв. Хүмүүс өөрсдөө л сайн дураараа хот хүрээ газар шавааралдан сууцгааж байгаа. Хэн ч тэднийг хот суурин газарт аж төр гэж албадаагүй. Хот бол тэдний сонголт. 
                             *                                                                        *                                                                   *
...Оюун санаандаа эрх чөлөө бий болгох тэрхүү үйл явц бол ямар нэгэн зургийг хичнээн гайхамшигтай ур авьяас шаардан зурахаас ч илүү үнэ цэнэтэй зүйлийг агуулж байдаг...