Зохиогч Ш.Ванчаарайн уран бүтээлд үргэлжилсэн үгийн богино төрөл найруулал томоохон байр эзэлдэг нь бас өөрийн учир шалтгааны холбоотой ажээ. Тэрбээр МУИС-ийн ахлах ангид орсон үедээ өгүүллэг (1957 он) бичсэний зэрэгцээ найруулал бичиж эхэлсэн нь төвийн тогтмол хэвлэлд хэвлэгдсэн түүхтэй. Түүний найрууллын зохиолын түрүү дээж нь "Залуу насны хүч" (Утга зохиол сонин,1958), "Ариун сэтгэлийн угаас" (Үнэн сонин, 1958) зэрэг бүтээл байлаа. Энэ бол зохиолч, уран бүтээлчийн цар хүрээг өргөтгөх гэсэн эрмэлзэл байсан бол хожим эрүүл мэндийн сурталчилгаа, хэвлэлийн ажлыг 30 гаруй жил хариуцан ажилласан нь уг төрөл зүйлтэй уран бүтээлийн холбоогоо зузаатгахад зүй ёсны шаардлага болсон байна. Түүний найруулалд хүн ардын эрүүл мэндийн асуудал, сувилагч, бага эмч, их эмч, манай орны хүн эмнэлгийн тэргүүний сайчууд, алдар гавьяатнууд ажил амьдралын бодит түүхээр мөнхөрч манай эрүүлийг хамгаалах байгууллагын өвөрмөц нэгэн түүх бичлэг болсноороо уран зохиол нь нийгэм судлал болж байгаа өнөө үеийн шаардлагыг биелүүлж чадсан гавьяатай билээ.