Уг номд маань багтсан бүх номлолууд “Үүрдийн Гэгээ” Чуулганы индэр дээрээс номлогдсон юм. Бурханы хайр нигүүлслээр миний амьдрал энэ чуулгантай салшгүй холбогджээ. Энэ чуулганд миний бие эрийн цээнд хүрч, эхнэртэйгээ танилцан, гэр бүл болж, басхүү үйлчлэлдээ гаршсан билээ. Анх энэ чуулганы үүдэнд угтагч, хүүхдийн багш хийж эхэлснээс хойш Удирдах Зөвлөлийнх нь дарга, Залуучуудыг нь хариуцсан пастор болтлоо үйлчилжээ. Бараг хийж үзээгүй үйлчлэл үгүй болов уу. Тийм болохоор, “Үүрдийн Гэгээ” чуулгандаа баярлаж явахаас өөр аргагүй билээ.

“Наран дор шинэ зүйл үгүй” гэж Библи сударт хэлсэн байдаг. Үнэхээр тийм. Эдгээр номлолуудыг би гэнэт бодоод олчихоогүй. Ганц хоёр номлолынхоо санааг үгийг тунхаглаж байсан бусдынхаа номлолоос олж авсан бөгөөд чуулганыхаа цаг үе ба хэрэгцээнд тохируулан, өөрийнхөөрөө найруулан номлосон билээ. Зарим номлолууд маань тухайн цаг үедээ хамаатай байсан, бас үгийг номлох үйлчлэлд дөнгөж дадлагажиж байх үед номлогдсон тул өнөө цагийн хэрэгцээнд тохирохгүй байх боломжтой.

Гэвч “ашигтай үнэнийг ахин дахин сануулж бай” гэсэн мэргэн үгээр ишлэн, тус чуулгандаа номлож байсан номлолуудаа эмхтгэн нийтэллээ. Мэдээж хэрэг номлож байсан бүх номлолууд маань багтаагүй. Шалтгаан нь маш энгийн. Тэр болгон номлолуудаа цаасан дээр буулгаж байсангүй. Харин уг номд маань хэзээ нэгэн цагт цаасан

дээр буулгагдан, хадгалагдан үлдсэн номлолууд маань багтсан. Хамгийн эхний “Үнэн Найз” гэсэн сэдэвтэй номлол гэхэд 2001 оны 9 дүгээр сард Өсвөрийн Сион цуглааны Сайн мэдээг тараах тусгай цуглааны үеэр номлогдож байлаа. Энэ мэтчилэн тусгай хөтөлбөрт арга хэмжээнүүдэд зориулсан номлолууд маань бичгэн хэлбэрээр хадгалагдан үлдэж чаджээ. Харин бичигдээгүй номлолуудын хувьд тухайн цаг үедээ, сонсогчдод ивээл ерөөл болоод дууссан нь тодорхой.

Ингээд та бүхний өмнө Эзэний Үгээс дамжуулан айлдсан номлолууд маань дэлгэгдэж байна. Үгээс ирдэг ивээл ерөөлүүдийг авахыг уншигч танд хүсэн ерөөе. Эзэн Есүс Христ эрхэм уншигч танд үргэлж сайнаар хандаж байх болтугай!