Хятад мөрөөдөл: Ши Жиньпин хэрхэн Хятадыг удирдаж, их гүрний алсын харааг тодорхойлов? Энэ ном нь Ши Жиньпин 2012 онд БНХАУ-ын удирдагч болж, Хятад мөрөөдөл хэмээх үндэсний стратегаа зарласан үеэс 2024 он хүртэлх 12 жилд Хятадын улс төрд өрнөсөн үйл явдлуудыг найдвартай гэж тодорхойлж болох эх сурвалжуудад тулгуурлан тайлбарласан болно. Ши Жиньпин энэ цаг үеийг “100 жилд үл тохиолдох агуу их өөрчлөлтийн эрин үе” гэж тодорхойлжээ. Хятад мөрөөдөл нь иргэдээ иргэншлийн ижилслээр нь үндэсний стратегид нэгтгэхийг зорьсон дотоод улс төрийн хөтөлбөр ажээ. Тэгвэл Хятад мөрөөдөл нь Хүйтэн дайны дараах иргэншилд дулдуйдсан ижилслийн улс төрийн эринд Өрнийн иргэншлийг сөрөх мөрөөдөл үү? Хятадын бодлого боловсруулахад нөлөөлдөг тэргүүлэх философичид XX зуунд дэлхийг хуваасан нацизм, коммунизм, капитализмын сөргөлдөөнийг Өрнийн иргэншлийн үзэл санааны дотоод зөрчил л байсан, харин Хятадын хөгжлийн загвар нь иргэншилдээ тулгуурласан хэмээн дүгнэж байгаа бол ХХI зуун Өрнийн болон Дорнын өрсөлдөөн болж чадах уу? Хятадын удирдагчдын хувьд ардчилал, хүний эрх зэрэг үнэт зүйл нь хүн төрөлхтөний түгээмэл үнэт зүйл биш, харин Дорнын иргэншилтэй сөргөлдөх Өрнийн иргэншлийн үнэт зүйл үү? XXI зуунд аж үйлдвэржсэн Хятад орон XIX зууны Аж үйлдвэрийн хувьсгалын дараах Европын замыг туулж байгаа бол марксизм Хятадад бодитоор сэргэж байна уу? “Зөвлөлт Холбоот Улсын Коммунист Намыг 1991 онд хуулиар хориглож байхад 20 сая гишүүд нь хаана юу хийж байсан бэ?” гэж асуудаг Ши Жиньпиний хувьд Дэн Сяопины Өөрчлөлт, нээлттэй хаалганы бодлогын дараа намд төдийгүй нийгэмд бүдгэрсэн коммунист үнэт зүйлийг сэргээх нь Хятадын Коммунист Намын легитим болох уу? Түүхийн төгсгөл гэдэг нь үзэл санааны эцсийн ялалт, үйл хэргийн төгс биелэл юм бол 2049 он Хятадын хувьд түүхийн төгсгөл үү? Эдгээр асуултын хариултыг энэ ном өгөх болно.